ကြွယ်ဝချမ်းသာချင်ရင် ရှောင်ရမယ့် အချက် ( ၁၀ ) ချက် ! (ပ – ၃)

( ၃ ) ငွေရှာရတာလွယ်မယ်လို့ထင်နေခြင်း

 Financial Freedom ရစေရမယ်လို့အာမခံနေတဲ့လုပ်ငန်းတွေအများကြီးရှိပါတယ်။ အဲဒီလုပ်ငန်းတွေကနေ သူတို့ကို ချမ်းသာအောင်လုပ်ပေးမယ်လို့ယုံကြည်နေတဲ့ လူတွေအခုထိရှိနေသေးတာလဲ အံ့သြစရာပါ။

 ဥပမာ – လောင်းကစားပေါ့။ အရင်တုန်းကတော့ ပါချင်ကိုလို့ခေါ်တယ်ထင်တယ်။ ( ကျနော်တို့ကတော့ ပါတာကုန်လို့ခေါ်တာ ) အစပိုင်း နိုင်သယောင်လုပ်ပေးပြီးနောက်ကျပါသမျှကုန်တာလေ။

 Network Marketing – အခုခေတ်စားနေတဲ့ MLM လိုမျိုးပါ။ ထိပ်ဆုံးနားကလူတွေကောင်းစားပြီးအောက်ခြေက လူတွေကုန်တာမျိုး ( ပွန်ဇီ Scheme လို့လဲ ခေါ်ကြလေရဲ့ ) ။နောက်ကျတဲ့လူတွေကပါတာကုန်သလောက်ပါပဲ။

 အလွယ်ပိုက်ဆံချေးတာ – အမျိုးတွေ၊ အသိတွေပိုက်ဆံချေးတာလဲပါသေး။ ပြန်မဆပ်လို့ဥပဒေအရအရေးယူဖို့လဲ ခက်တာမျိုးက ကြုံရဦးမှာ။ ဘယ်လောက်ပဲ စနစ်တကျလုပ်လုပ်၊ အမျိုးတွေနဲ့လုပ်တဲ့အလုပ်က ဆုံးဖြတ်ရခက်လွန်းတယ်။

 Cryptocurrencies တွေနဲ့ကစားတာ – Cryptocurrency ဆိုတာ ပိုက်ဆံရှာဖို့မလွယ်ပါဘူး။ သူက ကိုယ့်ရှိတဲ့ပိုက်ဆံကို တခြား Currency တစ်မျိုးနဲ့သိမ်းထားတဲ့သဘောပါပဲ။ လွယ်လွယ်မြတ်၊ လွယ်လွယ်ကုန်၊ မြန်မြန်မြတ်၊ မြန်မြန်ကုန်နိုင်တာမျိုး။ ကိုယ့်ဘာသာကိုယ် ဘာလုပ်လိုက်မိမှန်းမသိဘဲ ရှိသမျှကုန်သွားတာဖြစ်နိုင်တယ်

 တကယ်တော့ပိုက်ဆံများများလိုချင်ရင် အလုပ်လုပ်ရမယ်၊ တကယ်အလုပ်ဖြစ်တဲ့ နေရာမှာ ကိုယ့်ရှိတဲ့ အချိန်နဲ့ငွေကိုရင်းနှီးရပါမယ်။
တကယ်ကတော့ အစွမ်းကုန်ကြိုးစားအားထုတ်မှုလို့ပြောရပါလိမ့်မယ်။ တချို့လူတွေကတော့ ကံကောင်းလို့ပါကွာလို့ထင်ကောင်းထင်မှာပေါ့။

 ကျနော်တို့ငယ်ငယ်ကတည်းက သိခဲ့ရမှာက အလွယ်တကူရမယ့် ပိုက်ဆံဆိုတာမရှိဘူးဆိုတာရယ်ပါ။ ကိုယ့်မိဘက ကိုယ့်ကိုအဲလိုသင်ကြားပေးခဲ့တယ်ဆို သူတို့ကို ကျေးဇူးတင်လိုက်ပါ။