ဘက်လိုက်မိနေသလား?

 မန်နေဂျာတစ်ယောက်အနေနဲ့ဆိုရင် ဘက်လိုက်လို့မရပါဘူး။ ဒါပေမယ့် မန်နေဂျာလဲ လူသားပဲဆိုတော့ ဘက်လိုက်မိတဲ့အခါတွေရှိနိုင်ပါတယ်။ အဲလိုဘက်လိုက်မိရင်လဲ ကိုယ့်ဝန်ထမ်းတွေအတွက်က အဆင်မပြေတော့ဘူးပေါ့။ အဲတော့သတိထားရမှာက ကိုယ်ဟာ ဘက်လိုက်တတ်သူတစ်ယောက်များဖြစ်နေသလားဆိုတာကိုပေါ့။

အများအားဖြင့် လူ့သဘာ၀က ကိုယ်နဲ့အနေနီးသူကို ပိုခင်တွယ်တတ်ပါတယ်။ ဒါလဲမထူးဆန်းပါဘူး။ ဒါပေမယ့် မန်နေဂျာတစ်ယောက်အနေနဲ့တော့မဖြစ်သင့်ဘူးပေါ့။

 ကိုယ့်လက်အောက်မှာဝန်ထမ်းတွေလဲရှိတယ်။ အဲဒီဝန်ထမ်းထဲက တချို့ကကျတော့ ကိုယ့်အနားမှာရှိနေပြီး တချို့က ကိုယ့်အဝေးမှာရှိနေတတ်ပါတယ်။ အဲဒီအခါမျိုးမှာကိုယ်နဲ့အထိအတွေ့များတဲ့ ကိုယ့်အနီးကသူဘက်ကို မသိမသာဘက်လိုက်သွားတာမျိုးဖြစ်တတ်တာပေါ့။ ဒါဆိုဘာလုပ်ရမလဲ။

 ပထမဆုံးတော့ ရလာဒ်ဦးစားပေးတဲ့အလေ့အထကို တည်ဆောက်ပါ – ကိုယ်ဟာမန်နေဂျာတစ်ယောက်အနေနဲ့ အဓိကက ကိုယ်နဲ့အနေနီးသူထက် ရလာဒ်ကောင်းရဖို့၊ ပူးပေါင်းဆောင်ရွက်တတ်ဖို့နဲ့ တီထွင်ဆန်းသစ်နိုင်စွမ်းကိုသာ ဦးစားပေးတယ်ဆိုတဲ့ အလေ့အထကို ကိုယ်တိုင်စတင်ကျင့်သုံးရမှာပါ။ အဲဒီနည်းအားဖြင့် လက်အောက်ဝန်ထမ်းတွေအနေနဲ့ သူတို့ဟာ ဘယ်နေရာမှာပဲနေနေ သူတို့စွမ်းဆောင်ရည်နဲ့ရလာဒ်တွေကောင်းရင် သူတို့ကို အသိအမှတ်ပြုမှာသေချာတယ်ဆိုတဲ့ယုံကြည်မှုတစ်ခုရလာပါလိမ့်မယ်။

 နောက်ပြီးတော့ အဝေးကဝန်ထမ်းတွေကို ပုံမှန်ဆက်သွယ်တာမျိုးလုပ်ရမှာပါ။ ဥပမာ – အပါတ်စဉ် ဒါမှမဟုတ် ၂ ပါတ်တခါ ဖုန်းခေါ်မယ်။ ဒါမှမဟုတ် Zoom နဲ့အဆက်အသွယ်လုပ်မယ်ပေါ့။ ဒီနည်းအားဖြင့် ကိုယ်ဟာမန်နေဂျာတစ်ယောက်အနေနဲ့ သူတို့ကိုပစ်မထားဘူး၊ ဂရုစိုက်တယ်၊ သူတို့ရဲ့လုပ်ဆောင်ချက်တွေတန်ဖိုးထားတယ်၊ သူတို့ရဲ့အခက်အခဲတွေကို ဖြေရှင်းပေးဖို့ကြိုးစားတယ်။ စသဖြင့်ပေါ့ ယုံကြည်လာပြီး အလုပ်အပေါ်ပိုပြီး တန်ဖိုးထားကြိုးစားလာကြမှာဖြစ်ပါတယ်။

 နောက်တစ်ခုက အစည်းအဝေးတွေ၊ Gathering တွေလုပ်တဲ့အခါ အဝေးကလူတွေကို ချန်မထားဘဲနဲ့ သူတို့ပါပါဝင်နိုင်အောင် မဖြစ်မနေစီစဉ်ပေးသင့်ပါတယ်။ ဒါမှ ဖြစ်ပျက်နေတာတွေအားလုံးကို သူတို့ကိုယ်တိုင်လဲသိရှိထားပြီး သူတို့က ဘယ်အခန်းကဏ္ဍကနေပါနေရသလဲ၊ ပါနေရမလဲဆိုတာကို နားလည်သဘောပေါက်ပြီး အကောင်းဆုံးလုပ်နိုင်မှာဖြစ်ပါကြောင်း ပြန်လည်မျှဝေပေးလိုက်ပါတယ်။
အားလုံးပဲ လေ့လာသင်ယူပြီး အောင်မြင်တိုးတက်ကြပါစေ။